പത്തനംതിട്ട: സംസ്ഥാനത്തുടനീളം വീശിയടിക്കുന്ന യുഡിഎഫ് കാറ്റ് പത്തനംതിട്ട ജില്ലയിലെ അഞ്ച് മണ്ഡലങ്ങളിലും പ്രകടമാണ്. ജില്ലയിലെ അഞ്ച് സീറ്റുകളിലും ഇഞ്ചോടിഞ്ച് പോരാട്ടമാണ് നടക്കുന്നത്. തിരുവല്ലയിൽ എൽഡിഎഫ് സ്ഥാനാർത്ഥി മാത്യു ടി. തോമസും യുഡിഎഫിന്റെ അനൂപ് ആന്റണി ജോസഫും തമ്മിൽ ഓരോ റൗണ്ടിലും ലീഡ് നില മാറിമറിയുകയാണ്. റാന്നിയിൽ അഡ്വ. പ്രമോദ് നാരായണനെതിരെ യുഡിഎഫ് ശക്തമായ വെല്ലുവിളിയാണ് ഉയർത്തുന്നത്.
ശ്രദ്ധേയമായ പോരാട്ടം നടക്കുന്ന ആറന്മുളയിൽ കുമ്മനം രാജശേഖരന്റെ സാന്നിധ്യം എൻഡിഎയ്ക്ക് വലിയൊരു ഊർജ്ജം നൽകിയിട്ടുണ്ടെങ്കിലും, യുഡിഎഫ് തരംഗം ഇവിടെയും പ്രതിഫലിക്കുന്നുണ്ട്. കോന്നിയിൽ സിറ്റിംഗ് എംഎൽഎ കെ.യു. ജനീഷ് കുമാർ തുടക്കത്തിൽ മുന്നിലായിരുന്നെങ്കിലും പോസ്റ്റൽ വോട്ടുകൾക്ക് പിന്നാലെ മെഷീൻ വോട്ടുകൾ എണ്ണുപ്പോൾ ലീഡ് നിലയിൽ വലിയ വ്യതിയാനങ്ങളാണ് ഉണ്ടാകുന്നത്. ജില്ലയുടെ മലയോര മേഖലകളിൽ യുഡിഎഫിന് ലഭിച്ച വോട്ടുകൾ എൽഡിഎഫ് കേന്ദ്രങ്ങളെ ആശങ്കയിലാക്കിയിട്ടുണ്ട്. ഉച്ചയോടെ മാത്രമേ ജില്ലയിൽ ആര് ചിരിക്കുമെന്ന് വ്യക്തമാകൂ.