റാന്നി: കഴിഞ്ഞ ദിവസത്തെ ഹർത്താലിൽ കാൻസർ രോഗിയെയും കുടുംബത്തെയും തടഞ്ഞുവെച്ച് അസഭ്യം പറഞ്ഞ ആക്ഷൻ കൗൺസിൽ നേതാവിനെ പോലീസ് അറസ്റ്റ് ചെയ്തു. നിതിൻ രാജ് ആക്ഷൻ കൗൺസിൽ ജില്ലാ വൈസ് പ്രസിഡന്റ് അജിമോൻ ചാലക്കാരിയെയാണ് വധശ്രമമുൾപ്പെടെയുള്ള വകുപ്പുകൾ ചുമത്തി റിമാൻഡ് ചെയ്തത്. ചികിത്സയ്ക്കായി ആശുപത്രിയിലേക്ക് പോകുകയായിരുന്ന രോഗിയെ തടഞ്ഞതിന്റെ ദൃശ്യങ്ങൾ സോഷ്യൽ മീഡിയയിൽ വ്യാപകമായി പ്രചരിച്ചിരുന്നു. ഇതിന് പുറമെ റാന്നി തീയാടിക്കലിൽ കാർ യാത്രക്കാരനെ മർദ്ദിച്ച സംഭവത്തിൽ കണ്ടാലറിയാവുന്ന 40 പേർക്കെതിരെയും പെരുമ്പെട്ടി പോലീസ് കേസെടുത്തിട്ടുണ്ട്. ഹർത്താലിന്റെ പേരിൽ സാധാരണക്കാരെ ബുദ്ധിമുട്ടിക്കുന്നവർക്കെതിരെ വിട്ടുവീഴ്ചയില്ലെന്ന കർശന നിലപാടിലാണ് പോലീസ്.
കാൻസർ രോഗിയെ തടഞ്ഞ നേതാവ് റിമാൻഡിൽ; റാന്നിയിലെ ഹർത്താൽ അക്രമത്തിൽ 40 പേർക്കെതിരെ കേസ്
