പത്തനംതിട്ട: ക്രമസമാധാനം പാലിക്കാൻ ലാത്തിയും തോക്കും ഒക്കെയുണ്ട്, പക്ഷെ സ്റ്റേഷൻ വളപ്പിലെ കാട്ടിൽ നിന്ന് ഒരു പാമ്പ് തലപൊക്കിയാൽ പന്തളത്തെ പോലീസുകാർക്ക് വല്ലാത്തൊരു വിറയലാണ്. പന്തളം പോലീസ് സ്റ്റേഷൻ പരിസരത്തെ പഴയ ക്വാർട്ടേഴ്സുകൾ കാടുമൂടി കിടക്കാൻ തുടങ്ങിയിട്ട് കാലം കുറച്ചായി. ഇതിനിടയിൽ പാമ്പുകൾ സ്വൈര്യവിഹാരം നടത്തുന്നത് പോലീസുകാർക്ക് വലിയ തലവേദനയായിരിക്കുകയാണ്.
“ഞങ്ങൾക്ക് കള്ളനെ പിടിക്കാൻ അറിയാം, പക്ഷെ പാമ്പിനെ പിടിക്കാൻ ട്രെയിനിംഗ് കിട്ടിയിട്ടില്ല” എന്നാണ് പോലീസുകാരുടെ രഹസ്യമായ പരാതി. പോലീസ് റിസോഴ്സ് സെന്ററിന് തൊട്ടടുത്ത് വസിക്കുന്ന ഉദ്യോഗസ്ഥർ ഇപ്പോൾ ഡ്യൂട്ടി കഴിഞ്ഞാൽ പാമ്പുകളെ പേടിച്ച് വീട്ടിനുള്ളിൽ തന്നെ ഒളിക്കേണ്ടി വരുന്നു. സ്റ്റേഷൻ വളപ്പിലെ കാട് വെട്ടിത്തെളിക്കാൻ നഗരസഭ കനിയുന്നതും കാത്ത് നിൽക്കുകയാണ് നമ്മുടെ ‘ധീര’ ജവാന്മാർ. എന്തായാലും കാക്കി കണ്ടാൽ കള്ളന്മാർ പേടിക്കുമെങ്കിലും, കാട്ടിലെ പാമ്പിന് അത് അറിയില്ലല്ലോ എന്നാണ് നാട്ടുകാർ ചോദിക്കുന്നത്!