തമിഴ്നാട്ടിൽ നിയമസഭാ തിരഞ്ഞെടുപ്പിന്റെ വോട്ടെടുപ്പ് ഇന്ന് നടക്കുന്ന സാഹചര്യത്തിൽ, പത്തനംതിട്ട ജില്ലയിൽ ജോലി ചെയ്യുന്ന തമിഴ് വോട്ടർമാരുടെ വൻ തിരക്കാണ് കെ.എസ്.ആർ.ടി.സി ഡിപ്പോകളിൽ അനുഭവപ്പെടുന്നത്. ജില്ലയുടെ വിവിധ ഭാഗങ്ങളിൽ അസംഘടിത മേഖലകളിൽ ജോലി ചെയ്യുന്ന തൊഴിലാളികളാണ് വോട്ട് രേഖപ്പെടുത്താനായി തെങ്കാശി, തേനി ജില്ലകളിലേക്ക് കൂട്ടത്തോടെ യാത്രയാകുന്നത്.
പത്തനംതിട്ടയിൽ നിന്ന് തെങ്കാശിയിലേക്കുള്ള സർവീസുകളിൽ സീറ്റ് പിടിക്കാൻ പുലർച്ചെ മുതൽ വൻ വോട്ടപ്പാച്ചിലായിരുന്നു. ജില്ലയിലെ വസ്ത്രശാലകളിലും ഹോട്ടലുകളിലും ജോലി ചെയ്യുന്നവരാണ് ഇതിൽ അധികവും. തമിഴ്നാട്ടിലെ പൊളിറ്റിക്കൽ ത്രില്ലർ സിനിമകളെ വെല്ലുന്ന ആവേശം ഇന്ന് പത്തനംതിട്ടയുടെ ബസ് സ്റ്റാൻഡുകളിലും ദൃശ്യമായി. വോട്ടെടുപ്പിന് ശേഷം ഇവർ നാളെ മുതൽ തിരികെ എത്തിത്തുടങ്ങും.