ആറന്മുളയിൽ യുഡിഎഫ് സ്ഥാനാർത്ഥി അബിൻ വർക്കിയുടെ പര്യടനം രണ്ടാം ഘട്ടത്തിലേക്ക് കടക്കുമ്പോൾ മണ്ഡലം ആവേശത്തിലാണ്. നാരങ്ങാനം പഞ്ചായത്തിലെ സ്വീകരണ യോഗങ്ങളിൽ ശശി തരൂർ കൂടി എത്തിയതോടെ യുഡിഎഫ് ക്യാമ്പ് സജീവമായി. കഴിഞ്ഞ പത്ത് വർഷത്തെ എൽഡിഎഫ് ഭരണത്തിലെ വീഴ്ചകളും പണിതീരാത്ത പദ്ധതികളുടെ ഉദ്ഘാടനങ്ങളും ഉന്നയിച്ച് വോട്ട് ചോദിക്കുന്ന അബിന്, യുവാക്കൾക്കിടയിൽ ശശി തരൂരിനുള്ള സ്വീകാര്യത വലിയ മൈലേജ് നൽകുന്നുണ്ട്.
കടമ്മനിട്ടയിൽ തുടങ്ങി ആറന്മുള ക്ഷേത്ര പരിസരത്ത് സമാപിച്ച പര്യടനത്തിലുടനീളം വൻ ജനപങ്കാളിത്തമാണ് ദൃശ്യമായത്. മന്ത്രി വീണാ ജോർജിന്റെ വികസന അവകാശവാദങ്ങളെയും കുമ്മനം രാജശേഖരന്റെ സാത്വിക പരിവേഷത്തെയും നേരിടാൻ തന്റെ യുവത്വവും പ്രസരിപ്പും ആയുധമാക്കുകയാണ് അബിൻ. സഭാ വോട്ടുകളും നിഷ്പക്ഷ വോട്ടുകളും നിർണ്ണായകമായ ആറന്മുളയിൽ, തരൂർ പ്രഭാവം സൃഷ്ടിക്കുന്ന അടിയൊഴുക്കുകൾ അനുകൂലമാകുമെന്ന പ്രതീക്ഷയിലാണ് യുഡിഎഫ് നേതൃത്വം.
