പത്തനംതിട്ട: ജില്ലയിലെ പോസ്റ്റൽ വോട്ടിങ് കേന്ദ്രത്തിൽ ബാലറ്റ് ബോക്സ് മുദ്ര വെക്കാതെ തുറന്ന നിലയിൽ കണ്ടെത്തിയതിനെതിരെ യുഡിഎഫ് പരാതി നൽകി. ആറന്മുളയിലെ യുഡിഎഫ് സ്ഥാനാർത്ഥി അബിൻ വർക്കിയുടെ ചീഫ് ഇലക്ഷൻ ഏജന്റ് എ. അബ്ദുൽ ഹാരിസാണ് ജില്ലാ തിരഞ്ഞെടുപ്പ് ഓഫീസർക്ക് പരാതി നൽകിയത്.
വോട്ട് രേഖപ്പെടുത്തിയ ബാലറ്റ് പേപ്പറുകൾ നിക്ഷേപിക്കുന്ന ബോക്സ് അതീവ സുരക്ഷയോടെ മുദ്ര വെച്ച് സൂക്ഷിക്കേണ്ടതാണ്. എന്നാൽ ഇത് തുറന്ന നിലയിൽ കണ്ടത് വോട്ടുകളുടെ രഹസ്യാത്മകതയെയും സുരക്ഷയെയും ബാധിക്കുമെന്ന് യുഡിഎഫ് ആരോപിച്ചു. സംഭവത്തിൽ ഉദ്യോഗസ്ഥരുടെ ഭാഗത്തുനിന്നുണ്ടായ വീഴ്ചയിൽ വിശദമായ അന്വേഷണം വേണമെന്നും സിസിടിവി ദൃശ്യങ്ങൾ പരിശോധിക്കണമെന്നും യുഡിഎഫ് ആവശ്യപ്പെട്ടു. വിവാദത്തെത്തുടർന്ന് പിന്നീട് ബോക്സിൽ ഉദ്യോഗസ്ഥർ മുദ്ര പതിപ്പിച്ചു.
