ലക്ഷക്കണക്കിന് ഭക്തർ കാത്തിരുന്ന ആ പുണ്യ നിമിഷം ഇന്നെത്തുന്നു. സന്നിധാനവും പരിസരവും ശരണമന്ത്രങ്ങളിൽ ലയിച്ചു കഴിഞ്ഞു. മകരജ്യോതി കണ്ടുതൊഴാൻ എവിടെ നിൽക്കണം? തിരക്കിൽ പെടാതിരിക്കാൻ വഴികൾ ഏതൊക്കെ?
📍 സന്നിധാനത്ത് എവിടെ നിൽക്കണം? തിരുമുറ്റത്തും മാളികപ്പുറത്തും മാത്രമല്ല, പാണ്ടിത്താവളം, അന്നദാന മണ്ഡപം, ശബരി ഗസ്റ്റ്ഹൗസ്, വാട്ടർ അതോറിറ്റി ഓഫീസ് പരിസരം, കൊപ്രാക്കളം എന്നിവിടങ്ങളിൽ തടസ്സമില്ലാതെ ജ്യോതി കാണാം. ഹോട്ടലുകളുടെ പിൻവശത്തെ മൈതാനവും നല്ലൊരു സ്പോട്ടാണ്.
📍 പുല്ലുമേടും പരുന്തുംപാറയും സന്നിധാനത്തേക്ക് ഇനി എത്തിപ്പെടാൻ കഴിയാത്തവർക്ക് പുല്ലുമേട് (8 km അകലെ) മികച്ച ഓപ്ഷനാണ്. ഇവിടെ വെളിച്ചവും മൊബൈൽ റേഞ്ചും (BSNL) മെഡിക്കൽ ടീമും സജ്ജമാണ്. വണ്ടിപ്പെരിയാർ-വള്ളക്കടവ് വഴി ഇങ്ങോട്ടെത്താം. കൂടാതെ പരുന്തുംപാറ, പാഞ്ചാലിമേട്, ഇലവുങ്കൽ, അട്ടത്തോട്, നെല്ലിമല എന്നിവിടങ്ങളിലും സൗകര്യങ്ങളുണ്ട്.
⛔ ശ്രദ്ധിക്കുക: നിയന്ത്രണങ്ങൾ തുടങ്ങി! ഇന്ന് (ബുധൻ) രാവിലെ മുതൽ പോലീസ് നിയന്ത്രണങ്ങൾ കർശനമാക്കിയിരിക്കുകയാണ്.
- രാവിലെ 10 മണി: ഇതിനുശേഷം നിലയ്ക്കലിൽ നിന്ന് പമ്പയിലേക്ക് വാഹനങ്ങൾ കടത്തിവിടുന്നില്ല.
- രാവിലെ 11 മണി: പമ്പയിൽ നിന്ന് സന്നിധാനത്തേക്ക് ഭക്തരെ കയറ്റിവിടുന്നതും നിർത്തിവെക്കുകയാണ്.
- ഉച്ചയ്ക്ക് 1 മണി: നട അടച്ചു കഴിഞ്ഞാൽ ദീപാരാധന കഴിയുന്നത് വരെ ആരെയും 18-ാം പടി കയറ്റില്ല.
- കെട്ടിടങ്ങളുടെയോ മരങ്ങളുടെയോ മുകളിൽ കയറി ജ്യോതി കാണാൻ ശ്രമിച്ചാൽ പിടിവീഴും.
ജ്യോതി ദർശനത്തിന് ശേഷം തിരക്ക് ഒഴിവാക്കാൻ പാണ്ടിത്താവളം ഭാഗത്തുള്ളവർ കെഎസ്ഇബി പടി വഴിയും, മാഗുണ്ട ഭാഗത്തുള്ളവർ ബെയ്ലി പാലം വഴിയും പമ്പയിലേക്ക് ഇറങ്ങാൻ ശ്രദ്ധിക്കുക.
English Summary:
“Today is Makaravilakku. With the sacred Makarajyothi darshan just hours away, strict restrictions are now in force. Police have stopped allowing vehicles to Pampa from 10 AM and halted pilgrim entry to Sannidhanam from 11 AM. Devotees already at Sannidhanam can view the Jyothi from spots like Pandithavalam and Koprakkalam. Those unable to reach the shrine are advised to move to designated viewing points at Pullumedu, Parunthumpara, or Panchalimedu to avoid the massive gridlock.”
